اميره الريف 10

الجزء العاشر والأخير

بعد ما ماجد مشي من عندنا بدأت افكر في كل كلمة قالها وخوفي زاد جوايا وبعد ما كنت نسيت الخوف وافتكرت ان اخواتي عمرهم ما هيوصلولي لكن بعد كلام ماجد حسيت ان اخواتي علي بعد خطوة مني وبدأت افكر جديآ في اني اسيب شقة روايح ومكنش قدامي غير الشقة اللي كتبهالي محسن بيه قبل ما يموت ومن حسن حظي ان الشقة كانت مفروشة من كلة ومش ناقصها اي حاجة

بعد اسبوع من التفكير قررت اني لازم ابعد عن هنا نهائي وكلمت روايح بيني وبينها وقالتلي انتي دلوقت مش هقول زي بنتي بس هقول زي اختي الصغيرة واكيد انا معاكي في اللي بتقوليه

ابعدي بس تفتكري شقة الكورنيش بعيدة عنهم

انا :: لا مش بعيدة عنهم بس هناك علي الأقل هفتح صفحة جديدة مع نفسي وكمان حتي لو حد فيهم عرف يوصلي فأكيد لما يوصلوا ليا هناك احسن ما يوصلو ليا هنا

روايح زعلت من كلامي لكني اتأسفت ليها وحلفت اني مقصدش وان خيرها عليا وعمري ما انكر ده

روايح :: طيب انا عندي فكرة حلوة

انا :: فكرة ايه

روايح :: ايه رئيك تفتحي محل كوافير حريمي وتجيبي كام بنت يشغلو المحل لغاية ما تتعلمي وتشتغلي بأيدك

انا :: بس انا مبفهمش في الحاجات دي

روايح :: سيبي الموضوع ده عليا .. انا ليا واحدة صاحبتي فاتحة كوافير هكلمها واشوف محتاجين ايه ونشوف. كمان تجيبلنا حد من البنات يشتغل في المحل لغاية ما انتي تتعلمي والمحل يقف علي رجليه

عجبني كلام روايح وخلاص قررت اني هفتح محل كوافير وهعيش في شقة الكورنيش وابدا حياه جديده بعيد عن قرف الدعاره او القلق والخوف من القبض عليا.. لاني كنت متأكدة ان مهما طال الزمان او قصر مسيري هتحبس وساعتها الفضيحة والعار هتلاحق بنتي طول العمر

بنتي ااااااااااه ياقلبي اللي وجعني عليها .. قد ايه نفسي اشوفها واخدها في حضني .. ياتري بنتي دلوقت بقي شكلها ازاي وياتري بتتكلم … ياتري بتقول بابا وماما … بس هتقول لمين بابا وهتقول لمين ماما … حسيت بوجع في قلبي ودموعي نزلت مني غصب عني

ابتسام وسيده دخلو عليا وانا قاعدة مع نفسي سرحانة ودموعي علي خدي واول ما اخدت بالي منهم وشفتهم لحقت نفسي ومسحت دموعي لكنهم كانوا اخدو بالهم

سيدة :: اميرة مالك يابت في ايه

ابتسام :: في حاجة حصلت بينك وبين روايح يابت

انا :: لا مفيش بس سرحت شوية في بنتي

ابتسام :: مش عارفة اقولك ايه بس صدقيني هيجي يوم وهتشوفي بنتك وهتاخديها في حضنك

انا :: **** يا ابتسام **** لحسن بنتي وحشتني اوي .. ومحستش بنفسي غير وراسي في حضن ابتسام وانا منهاره بالعياط

ابتسام وسيده فضلوا يهدوني ويحاولوا يدوني امل وان مش بعيد علي **** يجمعني بيها تاني

بعد ما هديت قولت ليهم اني خلاص قررت اسيب السكة اللي ماشية فيها دي وهعمل مشروع كوافير وهروح اسكن في شقة الكورنيش

سيدة وابتسام فرحوا بالمشروع والقرار وابتسام قالت طب ايه رئيك ادخل معاكي شريك

انا :: بجد يا ابتسام عايزه تدخلي معايا شريك

ابتسام :: اه بجد انتي موافقة

انا :: طبعآ ياحبيبتي موافقة

سيدة :: وانا كمان هدخل شريك معاكم

انا :: ياريت وكدة يبقي مع بعض ايد واحده قلبنا علي قلب بعض

فات اسبوع وروايح قالتلي يلا البسي علشان هننزل نقابل صاحبتها في المحل بتاعها

لبست واخدت معايا ابتسام وسيده بصفتهم شركاء معايا في المشروع اللي هنعملة وروحنا قابلنا الست مدام سهير اللي رحبت بينا جدا وشرحت لينا هنحتاج نجيب ايه والمشروع هيكلف كام مصاريف والمكان اللي هنفتح فيه بيفرق في الاسعار بتاعة الشغل

بعد ما خلصنا ومشينا روايح اقترحت علينا نجيب محل ايجار ومنجبش محل تمليك .. لكني اصريت انا والبنات اننا نشتري محل تمليك ويبقي اللي هنصرفة عليه احنا اولي بيه وميجيش حد بعد كده يقولنا امشوا وفضوا المحل

شهر بحالة كل يوم عند سمسار شكل ونروح نتفرج علي المحلات اللي نحس انة صغير في المساحة او اللي تمنة غالي لغاية ما لقينا محل مساحتة حلوة اوي وسعره غالي بس تمنة فيه والاهم من ده كلة انه في منطقة راقية جدا وجنب الشقة مش بعيد

اشترينا المحل وفي خلال شهر ونص كنا جهزنا المحل وجبنا بنتين اشتغلوا وكان دوري انا والبنات اننا نتعلم الصنعة منهم

ابتسام وسيده عايشين مع روايح في شقتها اللي بطلت الدعاره خالص وعايشة من الفوايد اللي بتجيلها كل شهر من البنك غير ابتسام وسيده بيساعدوها في مصاريف البيت من دخل المحل اللي بيطلع ليهم

المحل اتعرف في اول ست شهور وبقي ليه زباينة غير شغل العرايس اللي بتطلع كل يوم من المحل ويوم ورا يوم المحل كبر واخدنا المحل اللي جنبة فتحناه عليه وبقي عدد البنات اللي شغالين فيه خمسة غيري انا وابتسام وسيده بعد ما اتعلمنا الصنعة

فات سنتين وعرفت من روايح ان ماجد اتصل بيها وعرفها ان اخويا الكبير خالد اتحبس لانة ماضي علي نفسة ايصالات امانة بخمسين الف جنيه .. استلف اربعين الف جنيه من واحد في البلد ومضاه علي خمسين الف علشان كان عايز يبني دور في البيت وفعلا بني الشقة لكنة معرفش يسدد الفلوس والراجل راح اشتكاه بالايصالات

انا سمعت الخبر ده وقولت لسيده وابتسام انا رايحة البلد ادفع الفلوس واخرج اخويا من المصيبة اللي هو فيها

ابتسام :: هتروحي فين يخرب بيتك انتي مش عارفة انك ممكن مترجعيش

انا :: ارجع او مرجعش انا مستحيل اسيب اخويا يتحبس

سيده :: طيب ما احنا ممكن نسدد الفلوس دي من غير ما انتي تروحي

انا :: انا مش لسة هدور علي طريقة انا هسافر يعني هسافر

سيده :: خلاص رجلي علي رجلك مش هسيبك تروحي لوحدك ابدا

ابتسام :: وانا كمان هروح معاكم

سيده :: ومين هيشوف المحل وياخد بالة منة .. خليكي انتي يابتسام وانا رايحة معاها

روحت البيت انا وابتسام لبست هدومي واخدت فلوس من اللي شايلاهم في البيت للظروف وقفلت الشقة وبعدين نزلت انا وابتسام اخدنا الأتوبيس وطلعنا علي البلد

سيده بعد ما احنا مشينا اتصلت بروايح عرفتها اني مشيت انا وابتسام علي البلد .. روايح ليها علاقاتها ومعارفها بسبب الشغل القديم

اتصلت بحد كبير والحد ده عمل اتصالاتة بالقسم التابع للبلد و اول ما وصلت البلد لقيت الشرطة عند البيت في انتظاري وبتأمني خوفا من بطش حد من اخواتي

قابلت في البيت اختي صباح اللي اول ما شافتني جريت عليا واخدتني بالأحضان والبوس وبتقولي كنتي فين ده اخوكي قلب الدنيا عليكي وندمان علي اللي كان هيعملة

بصيت لقيت بنتي قاعدة علي الكنبة

اول ما شوفتها جريت عليها وشلتها واخدتها في حضني وفضلت ابوس كل حتة فيها ودموعي بتنزل سيل من عيوني

صباح :: مامتك دي يا احلام مامتك رجعت ياحبيبتي

ابتسام كمان عيطت من المنظر وبقت بتمسح في دموعها

انا :: فين الراجل اللي اخويا استلف منة فلوس

صباح :: ليه يا اميره

انا :: علشان ياخد الفلوس بتاعتة ويتنازل عن المحضر

صباح :: وانتي جبتي الفلوس دي كلها منين يا اميرة

انا :: مش وقتة خالص يا صباح لما اخرج اخويا ونيجي نبقي نقعد ونحكي كل حاجة المهم دلوقت هو فين

صباح :: انا هلبس ونروحلة سوا

انا :: امال مرات اخويا فين

صباح :: في بيت اهلها من ساعة ما قبضوا علي اخوكي… انا هروح البس

صباح دخلت لبست ومشينا انا وهي وابتسام قعدت مع احلام بنتي

وصلنا للراجل وقولت فلوسك اهي تعالا اتنازل عن المحضر

الراجل قالي مينفعش خلاص. الموضوع بقي قضية. روحي ادفعي الفلوس في المحكمة

اخدت الفلوس وجريت علي القسم اللي محبوس فيه اخويا وطلبت زياره واتاري كل شئ كان مترتب بسبب تليفون روايح

الظابط قالي اتفضلي قعدت واستنيت علي ما اخويا جه

اول ما شافني وقف مذهول وبعدين جري عليا واخدني في حضنة وفضل يعيط زي العيال الصغيرة ويقولي سامحيني ياختي سامحيني انا عرفت كل حاجة من الكلب احمد

انا :: خلاص ياخويا مسمحاك المهم انا بكره هبقي من النجمة في المحكمة وهدفع ليك الفلوس وهخرجك ياخويا

خالد مسكني من ايدي زي المجنون جبتي منين الفلوس دي جبتيها منين

انا :: معملتش حاجة غلط يا خويا انا لما هربت منكم روحت مصر ومكنتش عارفة اروح فين ولا لمين وبقيت عمالة الف في الشوارع وبعيط لغاية ما لقيت ست عندها 50 سألتني مالك وحكيت ليها ظروفي اخدتني عيشتني معاها وشغلتني في كوافير بتاعها وفضلت تحت رجليها اخدمها لانها كانت عايشة وحيدة مكنش ليها اهل ولا اولاد والست في اخر عمرها كتبت الشقة والمحل بأسمي

الكدبة دخلت علي اخويا وصدقني وبعد ما خلصت الزياره روحت البيت انا واختي صباح وبالليل فهمت ابتسام علي اللي قولتة ل اخويا علشان لو حد سألها من ورايا

تاني يوم روحت المحكمة انا ومحامي ودفعت الفلوس بتاعة اخويا وخرجتة من القضية اللي كان فيها

اخويا قالي خليكي وعيشي معانا واحمد هيتجوزك … قولت ل اخويا احمد ده لو اخر راجل في الكون مستحيل اتجوزه انا هاخد بنتي وهرجع مصر. انا اكل عيشي هناك ومحلي وشقتي هناك

خالد :: مستحيل اسيبك تعيشي لوحدك في مصر

خليت ابتسام ترجع مصر وفضلت انا في البلد وبعد محاولات قدرت اقنع اخويا اني مقدرش اسيب محل بملايين يتسرق ويتنهب وفي الأخر اخويا اقتنع واخدت بنتي وسافرت

رجعت القاهرة انا وبنتي وحلفت ما في راجل تاني هيلمس جسمي وهعيش ليها هي وبس

بقلم الجنرال/ عادل المتميز 

تمت........